Aizawl, 8th October, 2025: The Right to Information Week, 2025 chu vawiin chawhma dar 11:00 ah ATI Auditorium, MINECO ah hman a ni a, Mizoram Larsap Gen (Dr) Vijay Kumar Singh, PVSM, AVSM, YSM (Rtd) chu khuallian niin hun a hmanpui a ni. He hunah hian DAA 28, SPIO 74, SAPIO 52, Local Council Chairman/SPIO 5, MUP President, media te leh sawm bik mi 13 te an tel bawk a ni. 

Chief Information Commissioner Pu John Neihlaia chuan inlawmna thu sawi pahin RTI chungchanga hriattur pawimawh tak tak a sawi tel a, public authorities te tan lak ngaihna te leh Mizoram RTI Online chungchang te a sawi bawk. CIC chuan Mizoram chhungah kum 2006 atanga chhiara vawiin ni thlengin RTI zawhna 45088 lai a luh tawh thu a sawi a. Hemi atang hian Second Appeal 257 chauh MIC chuan a la dawn thu te, First Appeal 730 a lut tawh a, RTI zawhna atanga chhutin First Appeal zat hi 2% chauh a nih thu leh hei hian SPIO ten hna an thawk tha thawkhat hle tih a lantir thu a sawi. Tin, CIC chuan Mizoram RTI online atangin RTI zawhna 22135 lai mai a lut tawh a, kumin chhung bikah RTI Online atangin zawhna 4838 a lut tawh tih a sawi bawk a ni. 

RTI Week, 2025 lawmna hunah hian RTI practitioner pahnih - 

Pi Lalremsangi Fanai leh Pu Zairemthanga te chu RTI atanga an tawnhriat sawi tura sawm an nih angin an hun tha takin an rawn hmang thei a ni.

Khuallianin thu sawiin sawrkar khalh ngil nan RTI tangkai zia te, Mizoramah public authorities ten hna an thawh that thawkhat avangin RTI Second Appeal pawh a tlem hle a ni a ti a, public authorities kalkhawm te pawh chhanna rintlak rang taka pe chhuak thin turin a fuih a ni.

RTI Excellence Award, 2025-2026 leh MIC Logo Design Competition lawmman sem a ni a, a hnuai ami ang hian lawmman sem a ni: -

1st Prize - Directorate of Tourism

2nd Prize - Mizoram State Legal Services Authority

3rd Prize - Department of Economics & Statistics

Consolation – PHE Department & Planning & Programme Implementation Department

MIC Logo Design Competition Award Winner:

Pu Lalhmingmawia, Republic Vengthlang


Pu Mangjangam Touthang, Information Commissioner-in lawmthu sawiin programme a khar a ni.