AIZAWL, October 5, 2026 — State Chief Information Commissioner Pu John Neihlaia chuan vawiin hian RTI Online Version 2 chu a tlangzarh. Mizoram State e-Governance Society (MSeGS) buatsaih, he platform tharah hian a hma kum 2022-a mi, RTI Online (Version 1), hnathawh dan kawng tam taka tihthat a ni a. Mipui leh Public Authority-te tan a hman nuam lehzual tura siam a ni. RTI Online Version 2 tlangzarh hunah hian State Information Commissioners Pu Mangjangam Touthang leh Dr. Lalzirmawia Chhangte te an tel bawk a ni.
RTI Online Version 2 hian a hmaa kan hman ṭhina mipuite duhkhawp lohna lai tam tak a su kiang a, mipuite tan heng thil thar ṭha tak tak te hi a rawn telh a ni:
- RTI application apiangin Ticket Number (Registration Number) a nei tawh dawn a. Hei hian application chhuizui a ti awlsam tawh dawn a ni. Tin, RTI details PDF mipuiten an download ah pawh detail kimchang zawk a lang tawh dawn a ni.
- Draft siam theihna leh thuziak format (bold, italics, underline, lists, etc.) theihna.
- SPIO leh FAA ten hun tiam chhunga hma an lak loh chuan system thar hian RTI diltu hnenah First Appeal emaw Second Appeal emaw a thehlut thei a ni tih inhriattirna chiang zawk a pe tawh ang.
- Login page ah Mizo tawngin FAQ dah a ni tawh a. Tin, department/office tin SPIO leh FAA te awlsam taka en theiha siam a ni bawk.
A chunga tlem azawng tarlan bak khi thil tih danglam tam tak a awm a, chu chuan mipuite mai bakah System Administrator te tan thlengin hnathawh a ti awlsamin a ti nuam tawh dawn bawk a ni.
