Chief Information Commissioner (CIC) John Neihlaia chuan vawiin (29.1.2024) hi a office-ah MJA member-te a kawm a, an hmalakna hrang hrangte a sawipui.
CIC sawi danin, RTI Act, 2005-a Section 4(1)(b) chuan sorkar office tinin an office-a an hmalakna leh hmachhawp mek chungchang chu a hranpaa RTI-a dil ngai loa, mipui hriat theih turin notice board, chanchinbu, tlangau (public announcement) leh website hmangin an tarlang/puangzar turin a ti.
Mizoram Information Commission (MIC) chuan an department website-a an hnathawh chungchang tarlanna hi a audit thin a, kum 2022 pawh khan Head of Department leh SPIO 40 (sawmli) chuang CIC chuan koin tha taka an hmalakna tarlang tawh thin turin a chah a ni.
John Neihlaia chuan MIC hian website hi a la audit chhunzawm zel tih sawiin, 'Chutih thalin, thawktu indaih tawk loh avangin duh angin hma a lak chak theih loh changte a awm thin,' tiin website check kawngah hian MJA leh media mite hmalakpui turin a sawm.
