February ni 28, 2024 khan Mizoram Information Commission leh Champhai DC Office tangkawpin Right to Information (RTI) Act 2005 Awareness Campaign buatsaih a ni.
Training hi Pu H.Dolianbuaia, Secretary, MIC in a kaihhruai a. RTI Act hmang hian mipuiin kan chanvo dik tak kan chang em? tih te a hriat theih a. Kan tu leh fate thlenga min nghawng thei thil a nih avangin hman tangkai a tul hle tih a sawi a. Pu Misael, Addl DC Champhaiin inlawmna thu a sawi hnuah Pu John Neihlaia, Chief Information Commissioner, MIC chuan thu sawiin, RTI in a tum ber chu langtlang taka sorkar a kal a, mipuiin sorkara a hriat duhte dik tak leh awlsam zawka a hriat a ni a. Sorkar inrelbawlna leh hnathawhte dik zawka a kal theihna tur te, eirukna tihbo te chu a tum bulpui ber a ni, a ti a.
RTI hi India parliament-in a passed avanga dan anga hman a ni satliah mai lova. RTI Act nei tur hian thangkhat lian zet a nawrtuten kawng bumboh tak an lo zawhpui tawhin an hmalakna rah chhuah a ni a. Chuvangin he dan hi a hlu lehzual a. Langtlang taka ram a kal theihna tura khawvela dan awm zingah a tha ber te zinga mi a nih thu a sawi a.
RTI Act kaihhnawiha chhanna pe theitu SPIO leh SAPIO ten he dan an hriatchian a tul ang bawkin, mipuite pawhin chhawr tangkai tak tak turin he dan hi zir zau a pawimawh hle tih a tarlang tel bawk.
He training-ah hian Pi Lily, Deputy Secretary, MIC chuan RTI Act 2005 kaihhnawihah zirtirna a pe a. RTI hmanga sorkara kan hriat duhte chu phone application leh online hmangin awlsam taka zawh theih a ni tawh, tiin, he danin a huam chin te, department-a a buaipuitute mawhphurhna leh tih tur hrang hrangte sawiin, zawhna leh chhanna hun hman a ni.
Training hi Pu Mangjanam Touthang, Infomation Commissioner, MIC chuan lawmthu sawiin a khar a. Champhaia Department hrang hrang aiawh te, VC, YMA leh MJA te an tel a ni.
