Speech by Chief Minister on RTI Week 2012

• RTI WEEK, 2012 HAWNNA INKHAWM  NI 5TH OCTOBER, 2012 A  VANAPA HALL A 
• CHIEF MINISTER PU _ THUSAWI.

           RTI Week kan hmang leh ta hi a lawmawm ka ti a. Nikum lamah khan kan hmang tawh a; tunah hian Zoram dung tluanah tangkai zawk a hman a nih theihna turin  hmalak chhoh mek zel a ni a. Tun kum reilote chhung hian kan hmang tangkai chho ve sawt viau a ni tih hi mipuite hian kan hre awm e. A tir lamah khan a hmang duhtute tan pawh a mante kha a to deuh a. Chung ang zawng zawng chu anihna tur ang taka hman a nih theihna turin RTI hi awlai zawk leh simple zawkin, mawl zawkin siam chhuah a ni. Kum 2006 atanga hman tan chauh a ni nachungin, hemi hun chhung hian dilna leh information duhtu mi 3505 laiin an hmang tangkai tawh a. Tin, RTI Act kan neih atang hianin mi inthlahdah tam takte chu an fimkhur phah ta niin a lang a; a lawmawm hle a ni. RTI Act hi ringtu nih nen pawh a inhmeh em em a; tingtu nun nena kal kawp chi ni pawhin ka hria. Lalpa tlanga ding tur chuan kut fai leh thinlung thianghlim nei turin min phut a, kan Bible-in, chumi ang kan neih theihna turin he RTI hi mipuiin an hman tangkai a ngai a ni.

            Hei kan hriat angin vawiin a kan ramin kan buaipui leh kan sawi tam ber chu Corruption kan tih hi a ni a. Corruption hi Zoram mipuiin kan han ngaihdan maiah chuan sawrkar sum eiruk tih hi a lang lian ber a; mahse, chu mai chu a ni lova. Corruption kan tih chuan inthlahdahnate, mahni hna a tui miah lohte, kut tling lova sum lak te leh eirukte hi a ni. Vawiinah hian kan ram buaina chu - sawrkarah a ni emaw, khawtlangah a ni emaw, mahni hna a tui lo kan tam hle a, a tui awm bawk mahse, a tui lo khan kan pawlh dal ang tih hlauhawm khawp a ni. Reilote, tlemte thawha tam tak hlawh tum kan tam a. Hei hian ram leh hnam nunah harsatna a siam a ni. Chutiang chu a nih avangin, Right to Information Act te pawh hi nasa lehzuala kan hman tangkai a pawimawh a. Vawiinah hian Official ai chuan khawtlang hruaitute leh mipui lampang, kan Local Council leh Village Council te leh khatiang zawnga ram tana rawngbawltute tam zawk se ka duh a. Chungho chu a hmang tangkaitu turte an ni. Vawiin thlengin mi ten information an duh, hriat an chak an han zawh a chhang chak lo chauh pawh nilovin, chhanna diklo pek chingte  pawh an awm a. Chungho chu sawrkarin an chungah dan a lek thei a ni, Right to Information atang pawhin tihte pawh kan hriat a tha a ni. Chutiang chuan vawiinah hian Right to Information Act, hetianga Zoram pum puiah a Week kan han hmang leh te hi thil lawmawm tak a ni a, kan ramin a mamawh em em a ni tih hi kan hre vek a. Chutiang chuan kan uar leh zual pawh a pawimawh hle tih kan hria a tha.

            Tin, Right to Information hi a hretu tur chu, mipui lam zawk an ni a. Corruption turtute, hmeithaite, pachhiate an chanvo lo ei sak tumtute leh an eisak thin a te, khang ho khan an hriat a pawimawh a. Tuna thil thleng mek chauh nilovin, kum 20 kal ta a thil thlengte pawh kha Right to Information Act hnuai atang hian a dil chhuah theih a ni tih mipuite hian hria se ka duh a. Tin, thil diklo leh thalo leh lungawi lohna kan neih apiangah heng hi hman tangkai theih a ni a.

             Tin, kan khaw bulah emaw, kan bialah emaw, kan district-ah project lianpui puite thawh a ni a, chungah chuan sum engzat nge sawrkarin a ruahman, engzat nge sen tawh, engtika zawh tur nge, eng angin nge an kalpui tih ang zawng zawngte pawh hi Right to Information Act hmang tangkai a, kan hriat tur a ni. Heng ang project reng rengte hi mipuite tan a ni a; sawrkar tan a ni mai lova, mipuite tan a ni. Chuvangin a neitu mipui ten kan hriat zung zung theihna turin mipui ten Righjt to Information Act hi kan hman tangkai a tul a. Tin, a Department concern-te pawhin mipuite hriat duh ang kha pek zung zung a tul a ni tihte pawh kan hriat a pawimawh a. Chu chu kan duty a ni. Tin, hei hi hna chuantlai a ni lova, sawrkar Department-ah thlakipin hlawh kan la a. Khami kan hlawh chhungah khan kan thawh ve tur, kan function pakhat, kan duty pakhat a ni tih kan hriat a tul. Chutiang chuan extraordinary thil ni lovin kei mahni hna chhung a kal ve a ni tihte pawh kan hriat a ngai a. Chuvangin, phur takin mipuiin a an information duh ang ang kha, a tha emaw, a chhia emaw, kan pe ngam tur a ni. Tin, School lam pang leh engemaw competitive examination lamah te pawh lungawilohna, complaint engemaw te a awm thin a, chanchinbuahte pawh a chhuak thin a. Chutiang chanchinbu a chhuak mai mai ni lovin, Right to Information Act hian School naupangte an lungawi lohna, examination a mark hmuh chungchangahte a awm a nih pawhin an nu leh an paten Right to Information Act hi an hman tangkai thei a ni tihte pawh hria se a thain ka hria a. Chutiang chuan mi diklote khalh ngiltu pawh a ni thei dawn a ni. Chutiang thleng chuan Right to Information Act hi kan hman tangkai chuan kan ram, kan hnam tana tha tur a ni a. Tute emaw va nekna emaw, tute emaw va nek sawrna a ni lova..

              Tin, Right to Information Act te pawh hi kan hmang tangkai tur a ni a; inthlahrunna a awm tur a ni lo a ni. Mite va hekna a ni lova, mite va nek chepna a ni lova, thenawmte diklo tak leh tihchhiat tuma va hekna lam a ni lova, sawrkar hna chhungah, kan ram, kan hnam tan tana kalphungah sum leh pai senna ang chiahte, heng ang zawng zawng hi sawrkar neitu chu mipuite kan ni a. India democracy-ah chuan chuvangin, a neitu ten kan hriat theihna tur a Right to Information Act hi lo din chhuah a ni a. Chuvangin, hemi hman tangkaina atangin - good governance, transparent government - kan neih a pawimawh a. Kan neih theihna tur a min khalh ngiltu tur pakhat a ni a. Chuvangin, sawrkar hnathawk zawng  zawng pawhin he Right to Information Act hi kan lawm ang a, kan welcome ang a. Tin, kan ram, kan hnam tana a tangkai thei ang bera hman a nih theihna turin kan responsive tur a ni tihte pawh kan hriat a thain ka hria. Chutianga ram leh hnam siam thatna tur thil pawimawh a nih avangin phur tak a kan kalpui a ngai a ni. Rorelna dik chu lui angin luang se la, felna chu luipui kang ngailo angin luang rawh se tih chu kan sawrkar thupui, kan changvawn a ni a. Chumi chu kan achieve theihna turin Right to Information Act hi hman rawpawimawh tak a ni tih kan hriat ka duh a ni.

                Hei Ethics Committee-te kan din a; an ni paawh hian heng Right to Information  Act-in a thil tumte nen a kal kawp tha tak tak tur, thawkho tha tak thei turte an ni nghe nghe a ni. Chutiang chuan vawiinah hian Ethics Committee-te angte pawh hi Right to Information Act-in a tum ang bawkin sawrkar hnathawk zawmthawte, inthlahdahte, kut tling lova sum lak pawisalote, khang ang zawng zawng kha min ven puitu tur atana din a ni a. Niminpiah maiah khan Lungleiah Seminar kan nei a, mipui response a tha em em mai a; Aizawl lam aiin a tha mah mah a ni. Kohhran hrang hrang hruaitute, tlawmngai pawl hruaitute, sawrkar hruaitute leh sawrkar hnathawk lam pawh an kal tha hle a. Zawhna zawh leh thusawi inchuh khawpin an tui hlawm a; a hlimawm hle a ni.

               Chutiang tak chuan he ram siam thatna kawngah hian hmanrua awm ang angte hi tute pawhin; sawrkar hnathawk pawhin, mipui vantlang lam pawhin kan hman  tangkai a tul a. Chuvangin vawiinah, helaiah, Right to Information Act Week kan han hmang lehte hi a pawimawh tak zet a. hei hi a pawimawhna hriain, sawrkar hnathawk zawng zawng, Department hrang hrangte, mipuiin kan Department atanga Information an duh ang angte, kut tling lova sum kan lo hmang a nih pawhin, thil a dik lova a kal a nih pawhin, - the people have the right to know, therefore, you have to be very responsive to the needs  of the people. Chutiang chu, kan ngaihtuahnaah kan kalpui tur a ni a, hei hi, mimal innekna a ni lova. Heram mipui hian kan sawrkar che ziate, kalphungte, thiltih dante kan hriat vek a ngai a ni.

                 Department thenkhatah, engemaw tender, quotation leh supply tur a lo awmin mi pakhatin, company emaw, pawl emaw, pathum/pali hmingin an chhang a. Ticuan rate hniam te te in an ti a, a sang deuhtein an ti a. Mi pakhat siin, Official zingahte pawh an awm a. Chutiang chuanan han chhang a, an offer a, an duh lova; khatiang khan sawrkar hi kawng tinreng a rawk tumte pawh kan  awm chho mek zel a. Chung ang venna atante pawh chuan hman tangkai a tul a ni. Chtichuan, kan zingah, sawrkar thnathawk  zingah, chutianga kan thawhpuite diklote pawh chu kan hre thei a ni.

                  Chuvangin, dikna kan duh chuan, chungangte pawh chu kan expose theihna turin kan kal chhoh a ngai a. Right to Information Act kher lo pawhin chutiang mite chu kan expose thei a ni. Chuvangin, vawiinah hian kan ram mipuite rawngbawltute, he Right to Information Week kal tlang a ka chah duh chu - Right to Information Act hi hmang tangkai leh zual ila,, he ram a corruption  kan tih inthlahdahnate, zawmthawtnate, kut tling lova sum laknate, eirukna kan tih te hi kan lo nekchep thei ang a. Tin, mipuipawh kan lo zalen ang a; kan ram hi hmasawnna kawng tinrengah a chak phah ang tih ka ring a ni.

                  Chuvangin, Right to Information Act hi tumahin hmelma anga en lovin, kan hnathawh leh kan ram development-ah leh kan ram mipuite moral reformation atana min tanpuitu hmanraw tha tak a ni tih anga  ngaihtuah a kal lui turin ka chah duh che u a ni.

                 Chief Information Commissioner thothang tha tak, thahnemngai tak leh a thawhpuite kan nei hi a lawmawm tak zet a.  Vawiin a Chief Information Commissioner kan neih hnu atang hian thui tak hmasawnna kan nei tawh a; a lawmawm ka ti a. Amah leh a thawhpuite hnenah lawmthu ka sawi a. Tin, department hrang hrang atanga thahnemngai taka lo tanpuitute leh mipuite duhna leh an phurnate, dikna an duhnate, rorelna fel an duhnate lan tir tur a Department atanga phur tak a lo tanpui thintute, dik taka an Information duh, engmah zep ruk awm lova dik taka lo chhang thintute chungah lawmthu ka sawi a ni.

                 Zoram pumah RTI Week hi tangkai tak leh tha taka kan hman theih nan leh kan ramah dikna kan laltir a, sawrkarah efficiency leh transparency a awm theihna tur a  hmanrua a nih theihna turin ka duh sak tak zet a. Vawiin a lo kal khawmte pawhin chutianga rilru pu turin leh he Right to InformationAct hi kan ram siam thatna tur atan, moral reformation min puitu atan hmang tangkai turin ka duh che u a ni.

•                  Ka lawm e.